Amazigh Cultural Association in America

Adlis-a n tmedyazt tamaziɣt (s taqbaylit) yeffeɣ-ed deg useggas 2008. Masinisa Lwennas yuzen-aɣ-d yiwet n trumalt n wedlis-is. Nesnemmir-it aṭas u nessaram-as tazmert tameqqrant akken ad ikemmel abrid n tira d usefru.

Hatta wacu d-ittwuran f umedyaz ameẓyan (asebter aneggaru n wedlis):

Amedyaz Masinisa Lwennas d yiwen ilemẓi ilulen ass n 06 Yulyu 1985 deg At Meḥmud di taddart n tewrirt Musa Waɛmer. Ilemẓi-agi ad yli seg wid i umi qqaren "tettuneft-asen" imi tamedyazt tezdeɣ-it, yettidir yis-s. Yesɛa acḥal d asefru deg wallaɣ-is. Ɣer tira, akken kan yerra lewhi-s imi d wagi i d ammud n isefra amezwaru i d-yeffɣen. Ad t-id-ḍefren wiyaḍ.

"
Tamzwarut ilaq a d-nini belli tira n tmaziɣt n wedlis-a gerrzent. ḍefrent ilugan n tira akken ilaq. D ayen waqila iɛedda zzman nni deg yal wa ittaru akken ibɣa. Isefra n Masinia serrḥen, uran s teqbaylit isehlen. Maca ufiɣ belli amedyaz ameẓyan yettader-ed isem n Ṛebbi, ad as-tiniḍ d awessar. Aya ur nezmir ara a d-nini ma yella ikka-d seg laɛwayed n leqbayel (am isefra n at zik) neɣ seg wakken amedyaz d win iḍefren abrid n Ṛebbi ak d tineslemt.
D amedya yenna deg usefru "Tamɛict nneɣ":

Newwi lmektub d aɛwin
Ṣṣber d lkuraj di sin
Nɣil iṭij ad aɣ-yecreq
Dawit-aɣ ay at ddin
Nɣant-aɣ tismin
Lebɣeḍ la d-iḥemmeq
At lbaṭel i ɣ-d-yezzin
Ur nettagad mi ara ɣ-awin
S wawal n Ṛebbi a d-nenteq

Ayen i yi-ɛeǧben deg wedlis-a, ɣas akka ittwadder-d degs Ṛebbi aṭas, d akken isefra n Masinisa d isefra n lḥif n imeẓyanen n tmurt n leqbayel. Am Masinisa Lwennas n At-Meḥmud, am Masinisa Germaḥ d waytm-as yeɣlin di tefsut taberkant (2001) anida ilemẓyen n tmurt n leqbayel kkren-d, neɣ a d-iniɣ ggelfaɛnt seg lḥir n tmuḥqqranit d lmizirya.

Deg usefru "Imeɛdar" yenna-yas:

Aqli-yi am win yessaramen
Ad sɛuɣ iḍarren
Ula d nekk ɛyiɣ di lemrar
Di ṣṣifa cubaɣ all medden
Lameɛna kkawen ifadden
Zzher-iw dima yenṭer
D lmut kan i ɣ-d-iṣaḥen
A nesteɛfu d ayen
Axir akka wala kter

neɣ akken i s-yenna deg usefru i wumi isemma: "Cubaɣ-k ay iṭirelli"

Cubaɣ tamɛict iṭirelli
Si ṭṭlam ur d-yettefeɣ
Ddunit teɛkes fell-i
A tafat ur am-zmireɣ
Xas ruḥ eǧǧ-iyi
Tannumi tesɛeb a tt-kseɣ

Maca deg tama nniḍen ilaq a d-nini dagi beli issewhem-aɣ yisem n wedlis-a "Laṣel mebla izerfan" acku adlis yewwi-d aṭas ɣef tlufa n tudert ak d tayri. Ulac aṭas n wawl ɛef izerfan neɣ laṣel.

Haten-a yismawen n isefra n Mas Masinisa Lwennas:

• Lakul yeḥfan
• Ččet a wid yeṛwan
• Mači d lmektub i daɣ-yebḍan
• Iḥnin-d ttxil-em
• Acḥal i tewɛer ddunit
• Yekfa laman
• Tamɛict nneɣ
• Acḥal i ɛettbeɣ fellam
• Imeɛcaq n yiḍ
• Ameɣbun
• A ccix ibeqqun
• Yellis n At-Dwala
• Yugi lemektub a ɣ-d-i
• Asirem
• Cubaɣ-k ay iṭirelli
• Ḥemmleɣ-kem
• Dda Lwennas
• Tanekkart n leḥsan
• Iɣriben
• Imḍarriyen
• Amek i kem-ssneɣ
• Tagemmunt Azzuz
• Xaṛub Yusef
• Yewweḍ-ed zzwaǧ-im
• Ur sɛiɣ ddwa n ḥellu
• D lexdma ɣef waydeg i nettnadi
• Mmi-s n umarkanti
• Tidett

Sɣur Ḥsen Larbi