Azul fellawen a wid iqqaren, wid ittaken azal i tagi nneɣ. Ass-a s lferḥ d ameqqran ara wen-d-qeddmeɣ yiwen umyaru. Ahat d amaynu ɣer kra n yemdanen, maca aṭas i t-yessnen. Argaz-agi isem-is Essaid At Maamar. Attan a wen-iniɣ belli tira ines gerrzent d ayen kan, snecraḥant, ttakent-ed asirem deg tmaziɣt (neɣ deg "teqbaylit" akken qqaren kra imedyazen nneɣ). Amagrad agi amenzu ara d-nawi sɣur Essaid, a t-nehdu i tmaziɣin akken llant i lmend n was n tmeṭṭut. Nekkini a t-hduɣ aṭas aṭas i yemma ɛzizen.
Tanemmirt ɣef terzeft nnwen. Ḥsen.
Dda Ɛmer bu tfenṭazit
A tawaγit-iw, a lqecc-iw d wi tbubbeḍ ay ul ageswwwaḥ!!!
Macahu γef wass-nni amcum, yettaken anzi s ussan-nniḍen kan:
Tekker nna Taferruǧt s asewwi n imensi, aεeqqa n wewren ur izad, ur yenγis. Amzun tettektil-iten ngum a d-kecmen taseksut.
Teftel, terḍem, tesseww, yewweḍ-d lawan n imensi, yekcem-d dda Ɛmer (argaz-is) s axxam.
Yeqqim γef ukursi, yeẓẓel iḍarren-is akken yessefk, yesnejbad akk iman-is akka d wakka, yuγal yenṭeq γef mmi-s, yenna-yas: Yya-d a Mexluf a mmi, qabel-iy-id akka s yahin s učči, meqqar ad sɛuɣ la biti!
Mexluf yekker iqubel baba-s γer ṭṭabla, nna Taferruǧt tessers-asen imensi zdat-sen.
Ččan, swan, rwan, uγalen ttgurruεen si bibṛas, dγa ufan-d γef wacu d-jebden awal:
Dda Ɛmer: Asmi d-newwi tislit si Xnecla i Bextis-nneγ, fkan-aγ-d at Meṛwan kra n imerṣumen n weksum a Mexluf a mmi fi εin cciṭan, wellah ar ugaren amehraz-inna deg ufus n yemma-k. Rnan-aγ-d yiwen lgazuz d aberkan, neswa almi neṭṭerḍeq, nuγal nettgurruε akka am tura. Twalaḍ a mmi li bbun sivinir, jjami u bli jjami teffɣen aqerru n yiwen "ya ma sseεd-k ya faεel lxir" ad yerḥem Rebbi iγsan n at lxir di lğennet!
Mexluf: Am arezg-nwen a ba, terwam-d MANJ TU s iqeffafen!
Lgazuz-nni aberkan ssawalen-as medden Kuka Kula (Coca Cola).
Dda Ɛmer: S bibṛas i t-xeddmen?
Mexluf: Wellah ma ẓriγ a ba, maεna ur cukkeγ ara, d lgazuz d- yennulfan di Marikan, si lazi akin, wissen ma yella dinna bibṛas…
Nna Taferruǧt tekker tejmeε ijeqḍuren ideg ččan yergazen, tesfeḍ-d ṭṭabla, tesdukel seksu d-yugaren deg iḍebsiyen-nsen γer yiwet tqedduḥt, terna-yas kra n useqqi, teqqim γer tγerγert (lqaɛa), acku nettat d tameṭṭut i tella, ur tessin ara i wučči a la Xnecla. Akken tessaweḍ snat neγ kraḍ n tγenjawin n seksu s imi-s, terwa si tmendit imi ur d-yenni ara dda Ɛmer ass-nni izad kra neγ yenγes. Tessers taγenjawt-is (tijγelt-is), tekker tebda asired n leḥwal.
Dda Ɛmer iremmeq-itt si teɣmert, iwala tessegra-d kra n iεeqqayen n seksu di tqedduḥt-is, iγil εni tefka axxam-is i uxessar.
Yečča wergaz timess, yesmermeɣ fell-as s leεyaḍ, yenna-yas:
Ssers-iten din ijeqḍuren-nni, ssers-iten din a ddin n yemma-m!
"Yessusef-as γer tqedduḥt, ttfuh, ttfuh!!!" snat tikkal, yenna-yas daγen: Mebla ddin n baba-m, mebla ddin n baba-m, a lukan a d-teğğeḍ yiwen uεeqqa yugar-d, ar d-iferreğ deg-m win ixaqen. Ayen a lmettwet, ṣṣreγ lɛar-im almi d ass-a akken ad tessnegreḍ axxam-iw yerna yal ass qqareγ-am lḥal ilmend n leḥwal, kemm tugiḍ ad tesleḍ. D ayen iɣef d am-ttεeggineγ iɣer tettuɣaleḍ. Yefka-yas sin iqeddimen γer tlemmast n uzagur, yuγal deg-s nnefs tmeɣdurt, teẓẓel deg tlemmast n tγerγert, teṣreɛ. Dda Ɛmer bu tfenṭazit yezzi, yenneḍ sennig uqerruy-is, yebren cclaγem-is, yenser axlul, yenneḥneḥ, yuγal yekker ad yekcem γer tɣurfett-is, yessegra-yas-d imeslayen-agi: A yelli-s n yiẓẓan, lammer a d-yini cciṭan igenni tεawdeḍ i ugejdur yecban wagi, a kem-refdeɣ d tamuddurt, a kem-id-sserseɣ d lmeyyet. Ihi tura nekk nniγ, kemm tesliḍ, ata wansi kkiγ!
Yekcem γer texxamt-is n tguni, yefser iman-is γef wusu, iger-d nnehta, yessaweḍ yiwen uɛemmur n ccemma, annect tettaddam telwaḥt γer ddaw n icenfer-is ufella yellan di tama taẓelmaṭ, yettban-d amzun temγi-d teẓrut ddaw tiṭ-is, yuγal-d acemma γer leεqel-is, imiren yesteqsa iman-is γef wacuɣer d wacu d-yella ccwal-nni deg wexxam.
amagrad ittkemmil
Win iran ad ilmed tamaziɣt (taqbaylit), ad iddu s asmel:
www.apprendrelekabyle.com
Wa iqqar i wa.
Those interested in learning Tamazight (Taqbaylit variant) can do so at the above website. Please share with your friends.
RSS Feed